MANILA, Philippines — Hinamon ni House impeachment prosecutor Terry Ridon nitong Martes si Vice President Sara Duterte na personal na harapin ang kaniyang impeachment trial, matapos sabihin na hindi maaaring magkaroon ng “bloodbath” sa pamamagitan lamang ng mga kinatawan.
Nagbigay ng pahayag si Ridon matapos magtungo si Duterte sa Senado upang makipagpulong sa kaniyang mga abogado ngunit umalis bago magsimula ang ikalawang araw ng kaniyang impeachment trial.
Pagdating sa Senado, nagbigay si Duterte ng maikling pahayag sa media: “In this bloodbath and bludgeoning, I will be bloodied but unbowed.” Pagkatapos nito, tumuloy siya sa isang maikling pulong kasama ang kaniyang legal team, na ayon sa kaniya ay nagpayo na huwag siyang sumagot sa mga tanong ng press.
Kinutya ni Ridon ang pahayag ni Duterte at sinabing hindi siya maaaring magkaroon ng “bloodbath” habang nasa gilid lamang ng paglilitis.
“Welcome to the bloodbath, Madam Vice President. But you cannot have a bloodbath from the sidelines. You cannot have a bloodbath through proxies. Hindi po pwedeng mga abogado lang ‘yung humaharap sa paglilitis. Humarap po kayo sa paglilitis, harapin po ninyo ‘yung katotohan,” ani Ridon.
“Hindi po siya cheerleader nito pong impeachment proceedings na ito. Siya po ‘yung nasasakdal, siya po ‘yung akusado. She has to be here for herself,” dagdag niya.
“I think instead of Invictus, kailangan maghanda papunta ng Convictus,” ani Ridon, kaugnay ng mga obserbasyong tila tumutukoy ang linya ni Duterte sa tulang “Invictus” ni William Ernest Henley.
Para kay Ridon, “apt” ang pahayag ni Duterte habang sinisimulan ng prosecution ang pagharap ng mga testigo sa impeachment article na nag-aakusa sa Bise Presidente ng umano’y pagkontrata para ipapatay sina President Ferdinand Marcos Jr., First Lady Liza Araneta-Marcos, at ang Former House Speaker.
“Maraming salamat sa inyong pahayag Madam Vice President. Makakadagdag po ito doon sa batayan kung bakit totoo at may batayan ‘yun pong articles of impeachment on threats against the President… Talagang ‘yung bloodlust ng ating Pangalawang Pangulo, not just against the President, but in this entirety of the impeachment proceedings, ay talagang totoo,” ani Ridon.
Samantala, sinabi ni House impeachment trial spokesperson Rep. Renee Co na hindi “status update” ang kailangan ng publiko mula kay Duterte kundi tuwirang sagot sa mga alegasyon sa Articles of Impeachment.
“The public is not interested in her status update. The public is interested in evidence. The public is interested in her answers to the long-standing questions na two years nang itinatanong ng taumbayan,” ani Co.
Kaugnay naman ng pakikipagpulong ni Duterte sa kaniyang mga abogado sa Senado, sinabi ni Co: “judging by the performance of the defense team yesterday, I, too, would like to confer with my team.” RNT
