MANILA, Philippines – Mistulang napiga ni Senador Bam Aquino ang prosecution panel na ilantad ang testigo sa pagkakakilanlan ng sinasabing hitman ni Vice President Sara Duterte upang patayin sina Pangulong Ferdinand Marcos Jr., First Lady Lisa Araneta at dating House Speaker Martin Romualdez.
Sa kanyang cross examination sa testigong si NBI Agent John Mark Calilung, isang digital experts na sumuri sa video ng pagbabanta ni Duterte, tinanong ni Aquino kung may sapat na testigo ang prosecution sa sinasabing hitman.
Matatandaan na kumalat sa social media ang pagbabanta ni Duterte sa mag-asawang Marcos at Romualdez na mayroon na siyang nakuhang hitman upang patayin ang mga ito sakaling ipapatay siya.
Ayon kay Aquino, may nabanggit sa statement ni Calilung sa affidavit na isinumite sa DOJ hinggil sa hitman.
“Sa totoo lang, iyong presensya ng hitman, mabigat iyon, mabigat iyon. So let me ask, are you the one who investigated just the video or did you also investigate the presence of the hitman that was being mentioned in the videos of the Vice President?” ayon kay Aquino patungkol kay Calilung.
“I was only tasked for the video, sir,” tugon ni Calilung.
Dahil dito, minabuti ni Aquino na idirekta ang tanong sa prosecution. “Will you be presenting other witnesses that will pertain to this alleged hitman?”
“As to the alleged hitman, Your Honor, please, yes,” ayon kay Atty. Amando Virgil Ligutan.
Kasunod nito, sinabi ni Aquino kay Calilung na “hindi kayo iyong nag-imbestiga niyan. Wala kayong alam tungkol doon sa presensya ng hitman?”
“Yes, Your Honor,” ayon kay Calilung kaya’t itinigil na ni Aquino ang pagtatanong sa naturang testigo at hihintayin na lamang ang testigo ng prosecution panel sa sinasabing hitman ni Duterte.
“Okay. Mr. President, I will refrain from my questions and wait for the witness pertaining to the hitman. Maraming salamat,” ayon kay Aquino.
“Noted and entered into the records,” ayon kay Presiding Officer, Senator-judge Francis “Chiz” Escudero. Ernie Reyes
