Tax relief sa workers, maliliit na negosyo isinusulong ng solon

MANILA, Philippines – Hinimok ni Parañaque 2nd District Rep. Brian Yamsuan ang Kongreso na agad aksyunan ang mga panukalang magbibigay ng tax relief sa mga manggagawa at micro at small enterprises (MSEs) sa gitna ng mataas na presyo ng mga bilihin.

Partikular na isinusulong ni Yamsuan ang pagtataas ng annual personal income tax exemption threshold at pag-aalis ng 2-percent Minimum Corporate Income Tax (MCIT) para sa maliliit na negosyo.

Naghain si Yamsuan ng House Bill No. 10577 na naglalayong itaas mula P250,000 patungong P450,000 ang taunang income tax exemption ceiling.

Sa House Bill No. 10578 naman, nais niyang alisin ang 2-percent MCIT na ipinapataw sa gross income ng micro at small enterprises.

Ayon sa mambabatas, higit na kailangan ang tax relief matapos umakyat sa 7.8 porsiyento ang inflation noong Oktubre mula 7.2 porsiyento noong Setyembre.

“When the ways and means panel approved these tax relief measures in August, inflation was at 6.2 percent. This rate accelerated to 7.2 percent in September and again to 7.8 percent last month,” ani Yamsuan.

Naaprubahan na ng House Committee on Ways and Means ang panukalang alisin ang MCIT para sa micro at small businesses.

Inaprubahan din ng komite ang pagtataas ng personal income tax exemption ngunit sa P350,000 kada taon, mas mababa sa P450,000 na panukala ni Yamsuan.

Giit niya, kailangang suriin kung sapat ang P350,000 threshold upang makatulong sa low- at middle-income families na nahaharap sa patuloy na pagtaas ng gastusin.

Sinabi rin ni Yamsuan na magiging dagdag-pasanin sa maliliit na negosyo ang MCIT dahil nakabatay ito sa gross income kahit maliit lamang o halos walang kinikita ang negosyo.

Aniya, maaaring magamit ng MSEs ang matitipid mula sa buwis para mapanatili ang operasyon at mga empleyado. RNT