MANILA, Philippines – Nanindigan ang Sandiganbayan Second Division sa desisyon nitong tanggihan ang mosyon ni Senador Jinggoy Estrada noong Hunyo na ibasura ang graft case laban sa kanya kaugnay sa umano’y mga kickback mula sa flood control projects ng pamahalaan.
Sa anim na pahinang resolusyon, sinabi ng anti-graft court na ang motion for reconsideration ni Estrada ay mga paulit-ulit nang argumento na naikonsidera at na-reject.
“No substantial matter has been presented which would warrant the modification, much less the reversal, of the Court’s findings in its order dated 4 June 2026,” sinabi ng korte.
Pinirmahan nina Presiding Justice Geraldine Faith Econg at Associate Justices Edgardo Caldona at Gener M. Gito ang resolusyon.
Si Estrada ay nahaharap sa reklamong graft sa Second Division sa umano’y P213.7 milyong kickback mula sa flood control projects ng pamahalaan.
Dinidinig naman ng Sandiganbayan Fifth Division ang P573 milyong plunder charge at hiwalay na graft charge kaugnay pa rin ng maanomalyang flood control projects. RNT/JGC
