NBI inirekomendang kasuhan si Tab Baldwin, 11 iba pa sa pagkamatay ng Ateneo cagers

MANILA, Philippines — Inirekomenda ng National Bureau of Investigation (NBI) na magsampa ng kaso ang Department of Justice (DOJ) laban sa nagbitiw na Ateneo de Manila University men’s basketball team head coach Tab Baldwin at 11 iba pa.

Ang rekomendasyon ay dumating matapos makumpleto ng NBI Homicide Division ang imbestigasyon sa pagkalunod na ikinamatay ng Ateneo student-athletes na sina Rene Baterbonia at Divine Adili sa isang training activity sa Dipaculao, Aurora, noong Hunyo 8.

Ayon sa NBI, inirekomenda nito na sampahan ng DOJ ang mga kasong reckless imprudence resulting in homicide laban kay Baldwin, anim na assistant coach, at physical therapist ng unibersidad.

Inirekomenda rin nito ang mga kasong simple negligence resulting in homicide laban sa tatlong may-ari ng resort at athletic director ng Ateneo.

Sa imbestigasyon nito, kinapanayam ng Homicide Division ng NBI ang iba’t ibang indibidwal, kabilang sina Ateneo President Roberto “Bobby” Yap, SJ; Baldwin; higit sa 20 kasalukuyan at dating Ateneo men’s basketball player; mga miyembro ng coaching staff; pisikal na therapist ng unibersidad; manggagawa sa utility; at ang may-ari at staff ng resort sa Dipaculao, Aurora, kung saan nangyari ang pagkalunod.