MANILA, Philippines – Magsasagawa ang Pamahalaang Lungsod ng Parañaque ng isang plebisito sa Hulyo 25 upang pagbotohan ng mga residente ng limang baybaying barangay ang panukalang ordinansa na naglalayong baguhin at itakda ang kanilang mga teritoryal na hangganan sa ilalim ng “straight line policy.”
Ayon kay Mayor Edwin Olivarez, ang plebisito ay sasaklaw sa mga Barangay Baclaran, Tambo, Don Galo, La Huerta, at San Dionisio, na may mga hangganang katabi ng mga reclaimed area sa Manila Bay.
Layunin ng panukalang ordinansa na opisyal na itakda at pagtibayin ang mga hangganan ng limang barangay sa loob ng mga reclaimed area ng lungsod sa pamamagitan ng paggamit ng straight line method bilang batayan sa pagtukoy ng kanilang mga bagong teritoryal na saklaw.
Ipinaliwanag ni Olivarez na mahalagang magkaroon ng malinaw at permanenteng hangganan sa mga lugar na naapektuhan ng reclamation at land development, kung saan naging mahirap nang tukuyin ang dating mga boundary.
Aniya, ang pagpapatupad ng straight line policy ay magbibigay ng iisang pamantayan sa pagtukoy ng hurisdiksyon ng bawat barangay, na makatutulong sa mas maayos na pamamahala, urban planning, at mas episyenteng paghahatid ng mga pangunahing serbisyo sa mamamayan.
Dagdag pa ng alkalde, inaasahang mapalalakas din nito ang lokal na pamamahala dahil magkakaroon ng mas malinaw na saklaw ng teritoryo ang bawat barangay, na makatutulong sa pagpapataas ng lokal na kita at sa mas epektibong pagpapatupad ng mga programang pangkaunlaran batay sa pangangailangan ng kanilang komunidad.
Nakikita rin ng pamahalaang lungsod na ang panukalang realignment ay magbubukas ng mas maraming oportunidad para sa paglago ng ekonomiya sa pamamagitan ng pagtatatag ng mga self-sustaining na komunidad at mas maayos na pamamahala sa mga reclaimed area.
Ang kapalaran ng ordinansa ay nakasalalay sa magiging resulta ng plebisito, kung saan kinakailangang makakuha ito ng mayorya ng mga boto mula sa mga kwalipikadong botante ng limang barangay upang ito ay mapagtibay.
Hinimok ng Pamahalaang Lungsod ng Parañaque ang lahat ng rehistradong botante sa Barangay Baclaran, Tambo, Don Galo, La Huerta, at San Dionisio na makilahok sa plebisito, dahil ang magiging resulta nito ay inaasahang magkakaroon ng mahalagang epekto sa pamamahala, administrasyon ng teritoryo, at patuloy na pag-unlad ng mga baybaying komunidad ng lungsod. James I. Catapusan
