MANILA, Philippines – Nagparinig si Senator-judge Panfilo “Ping” Lacson sa isang hindi niya pinangalanang “bopol” na senator-judge kaugnay ng impeachment trial ni Vice President Sara Duterte.
Sa social media, sinabi ni Lacson na marami sanang natututunan sa mahuhusay na abogado ng prosekusyon at depensa, ngunit nasisira umano ito kapag may “bopol” na senator-judge na nagsasalita.
Nauna rito, nagpahayag din siya ng pagkabigla sa aniya’y “nakakailang at nakahihiyang” sitwasyon kung saan tila pinangaralan ng isang abogado ang isang hukom tungkol sa Konstitusyon, Rules of Court, at mga umiiral na jurisprudence.
Hindi tinukoy ni Lacson kung sino ang tinutukoy niyang senator-judge. Sa naturang pagdinig, bukod kay Presiding Officer Francis “Chiz” Escudero, nagsalita rin sina Senate President Win Gatchalian at mga senator-judges na sina Robin Padilla, Erwin Tulfo, Alan Peter Cayetano, Tito Sotto, Kiko Pangilinan, Joel Villanueva, at Pia Cayetano. RNT/MDS
