Cloud Seeding Ops sa Magat Watershed, sisimulan na

CAUAYAN CITY, Isabela – Matapos ang isinagawang pagpupulong o orientation ng mga konsernadong ahensya ng pamahalaan ay agad na simulan ang cloud seeding operation sa Magat Dam watershed bilang bahagi ng hakbang ng pamahalaan na madagdagan ang pag-ulan upang mapataas ang water elevation ng nasabing dam.

Ayon kay NIA-MARIIS Department Manager Engr. Gileu Michael Dimoloy, sinimulan na ang cloud seeding operation matapos ang kanilang pag-inspeksyon sa mga logistics, kabilang ang eroplano at asin na gagamitin sa operasyon.

Sinabi pa ni Engr. Dimoloy, ang Bureau of Soil and Water Management (BSWM) ang nangasiwa sa procurement ng mga kinakailangang kagamitan at naihanda na ang mga ito noon pang Disyembre 2025 bilang paghahanda sa posibleng epekto ng El Niño.

Bago isinagawa ang cloud seeding operation ay dumaan sa kinakailangang clearance mula sa Civil Aviation Authority of the Philippines (CAAP) at koordinasyon sa Philippine Air Force (PAF).

Ipinaliwanag nito na hindi basta-basta isinasagawa ang cloud seeding dahil gumagamit ang BSWM ng makabagong teknolohiya upang matukoy ang mga ulap na may mataas na posibilidad na makapagbigay ng ulan. Sinabi nitong hindi lahat ng ulap ay maaaring isailalim sa cloud seeding dahil may mga scientific parameters at limitasyong sinusunod upang matiyak na magiging epektibo ang operasyon at hindi masasayang ang oras, fuel at pondo ng pamahalaan.

Naglaan ang pqmahalaan ng halos humigit-kumulang P2.5 milyon para sa cloud seeding operation na katumbas ng 30 flying hours.

Sa ngayon ay bahagyang tumaas na sa 162.2 meters above sea level ang water elevation ng Magat Dam matapos ang naranasang mga pag-ulan at ang ipinatupad na water management strategy ng NIA-MARIIS, kabilang ang pansamantalang pagsuspinde ng patubig sa ilang lugar upang maipon ang tubig at mapatubigan ang iba pang irrigation canals.

Sa kasalukuyan, nagpapatubig na rin ang NIA sa South High Canal, Oscariz Main Canal at iba pang bahagi ng irrigation system, habang umaasa ang ahensya na makadaragdag pa ang inflow ng Magat Dam ang inaasahang mga pag-ulan at ang nakatakdang cloud seeding operation.

Bagama’t una nang nagpaalala ang NIA na limitahan lamang sa 60,000 ektarya ang taniman ngayon cropping season na umabot na sa 91,000 ektarya ang natamnan matapos samantalahin ng maraming magsasaka ang mga pag-ulan nitong mga nakalipas na araw.

Gayunman, nagbabala itong mahihirapang masuportahan ang naturang lawak ng taniman kung hindi magpapatuloy ang pag-ulan, kaya umaasa ang NIA na magiging matagumpay ang cloud seeding.

Samantala, unang namahagi ang NIA MARIIS ng fuel subsidy sa mga apektado mga magsasaka o Irrigators Association upang maisalba ang kanilang pananim na palay. Ngunit una ng pinayuhan ang mga ito na magtanim pansamantala ng mga gulay o iba pang high value crops. (Rey Velasco)