MANILA, Philippines — Handa ang Department of Foreign Affairs (DFA) na sagutin sa Senado ang mga usapin kaugnay ng provisional understanding ng Pilipinas at China sa Ayungin Shoal, kasunod ng panawagang imbestigahan ang kasunduan.
“The DFA respects the Senate’s mandate to conduct hearings,” sinabi ni Foreign Affairs Spokesperson for Maritime Affairs Rogelio Villanueva sa isang text message.
“The DFA welcomes the opportunity to clarify matters surrounding the Provisional Understanding at the proper forum and in coordination with defense and security agencies.”
Inihain ni Senator Francis “Kiko” Pangilinan noong Hulyo 27 ang proposed Senate Resolution No. 536 na humihiling ng imbestigasyon upang matukoy kung naaayon ang arrangement sa 2016 arbitral award at kung ano ang epekto nito sa sovereign rights ng Pilipinas sa West Philippine Sea.
Nauna nang sinabi ng DFA na ang provisional understanding ay isang “set of principles and approaches” na layong maiwasan ang hindi pagkakaunawaan at maling kalkulasyon sa mga resupply mission patungo sa BRP Sierra Madre.
Binigyang-diin ng ahensya na hindi nito isinusuko ang soberanya at mga karapatan ng Pilipinas sa West Philippine Sea. Nagkasundo rin ang Pilipinas at China na ang arrangement ay “does not prejudice national positions.”
Bahagi ang Ayungin Shoal ng exclusive economic zone at continental shelf ng Pilipinas sa ilalim ng United Nations Convention on the Law of the Sea at ng 2016 Arbitral Award.
Bilang isang low-tide elevation, wala itong sariling maritime entitlement at hindi maaaring angkinin ng ibang estado.
“The Philippines alone holds the sovereign right to authorize any structure there, and Philippine vessels do not require permission to sail to Ayungin,” pahayag ng DFA noong nakaraang linggo. Dave Baluyot
