MANILA, Philippines – Ipatatawag ng Senado para sa ika- 11 araw na impeachment trial sa Agosto 3 ang dalawang auditors ng Commission on Audit(COA) bilang pagpapatuloy ng pagtalakay sa Article 1 o sa confidential funds ng impeachment laban kay Vice President Sara Duterte.
Batay sa manifestation ni House Prosecutor Gerville Luistro ay hiniling nito kay Presiding Judge Chiz Escudero na magpalabas ng subpoena ad testificandum, subpoena duces tecum kina Roderick C. Wamil, dating state auditor ng COA Intelligence and Confidential Funds Office at Celine May Del Campo, ang kasalukuyang state auditor ng COA ICFAO.
Kasama ring ipatatawag si Marivic Pareja, ang director ng House of Representatives Legislative Information Resources Management Department.
“Your honor, these three witnesses are intended to be presented on August 3, August 4, and August 5 trial schedules,” pahayag ni Luistro.
Layunin ng prosekusyon na gamitin ang mga testimonya nina Wamil, Del Campo, at Pareja upang pagtibayin ang kanilang mga ebidensya kaugnay sa iregularidad sa paggamit ng confidential at intelligence fund
Nakatutok ang paglilitis sa maling paggamit ng P612.5 milyong confidential at intelligence funds na natanggap ng Office of the Vice President (OVP) at ng Department of Education (DepEd) noong si VP Sara pa ang kalihim ng kagawaran.
Mula sa kabuuang P612.5 milyon, ang P500 milyon ay napunta sa OVP, habang ang natitirang P112.5 milyon ay ibinigay naman sa DepEd.
Nauna nang sinabi ng COA na naubos ang alokasyon para sa DepEd sa loob lamang ng 11 araw.
Matatandaan na nagpalabas ng Notice of Disallowance ang COA para sa P73 milyon confidential funds at iniutos na isauli ito sa pamahalaan. Gail Mendoza
