MANILA, Philippines – Tatlong babaeng biyahero ang na-offload sa Ninoy Aquino International Airport (NAIA) Terminal 1 dahil sa hinalang maaaring biktima sila ng human trafficking matapos matuklasan ang mga hindi tugmang detalye sa kanilang biyahe.
Ayon sa Bureau of Immigration (BI), nangyari ang insidente noong Setyembre 25. Una umanong sinabi ng tatlo na patungong Vietnam sila para magbakasyon, ngunit natuklasang Phnom Penh, Cambodia ang kanilang tunay na destinasyon batay sa kanilang E-class Cambodian visas.
Sa isinagawang panayam, napansin ng mga immigration officer ang mga hindi pagkakatugma sa kanilang destinasyon, haba ng pananatili at iba pang detalye ng biyahe.
Nakita rin ng mga awtoridad ang kuwestiyonable at umano’y pinakialamang mga dokumento, kabilang ang bank certificates, employment credentials at business registration records.
“I-Probes said these circumstances led officers to suspect that the passengers may have been recruited for employment in Cambodia, where Filipinos have previously been rescued from trafficking and illegal recruitment schemes linked to online scam operations,” ayon sa BI.
Ipinasa ang tatlong babae sa Inter-Agency Council Against Trafficking (IACAT) para sa karagdagang imbestigasyon, suporta at posibleng legal na aksyon laban sa kanilang mga lokal na recruiter.
Nagpaalala si BI Commissioner Joel Anthony Viado sa mga Pilipinong naghahanap ng trabaho sa ibang bansa na maging maingat sa mga alok, lalo na kung hindi malinaw ang trabaho o hindi pangkaraniwang mataas ang ipinapangakong sahod.
“Do not be easily lured by promises of high-paying jobs abroad, especially when the circumstances surrounding the offer are unclear,” ani Viado.
“There is a risk that you could end up like other Filipinos who have fallen victim to trafficking syndicates and suffered abusive working conditions,” dagdag niya.
Hinimok din ng BI ang mga biyahero na maging tapat sa immigration inspection at tiyaking tunay, kumpleto at tugma sa layunin ng biyahe ang kanilang mga travel at employment documents. RNT/MDS
