MANILA, Philippines – Inaresto ng pulisya ang isang 36-anyos na lalaki sa Quezon City matapos umano niyang pagbantaan na ikakalat ang maselang video ng isang 22-anyos na babae na nakilala niya online.
Kinilala lamang ang suspek sa alyas na “JC.” Nahuli siya noong Hulyo 27 sa harap ng isang fast-food restaurant sa Quirino Highway, Barangay Talipapa, matapos humingi ng tulong ang biktima sa Talipapa Police Station.
Ayon sa imbestigasyon, nagkakilala ang dalawa online matapos mag-alok ang suspek ng tulong pinansyal. Nagkita sila at noong Hulyo 18 ay nagtungo sa isang motel sa Pasig City, kung saan umano sila nagkaroon ng maselang pagtatalik.
Bago umalis, binura umano ng suspek ang kanilang online conversation at hinarangan ang numero ng biktima.
Makalipas ang mahigit isang linggo, nakatanggap umano ang biktima ng mga mensahe mula sa suspek na nagbabanta na ia-upload ang kanilang maselang video kapag hindi siya pumayag na makipagkita muli.
Dahil dito, nagsagawa ang pulisya ng entrapment operation na nagresulta sa pagkakaaresto ng suspek.
Nasamsam mula sa kanya ang isang gray VIVO cellphone at isang blue REDMI cellphone, na sumasailalim ngayon sa forensic examination.
Itinanggi ng suspek ang mga akusasyon at sinabing walang maselang video at wala siyang ginawang mali.
Nahaharap siya sa kasong grave coercion sa ilalim ng Article 286 ng Revised Penal Code kaugnay ng Cybercrime Prevention Act of 2012 (RA 10175), at paglabag sa Anti-Violence Against Women and Their Children Act (RA 9262) sa Quezon City Prosecutor’s Office.
Pinaalalahanan ng pulisya ang publiko na maging maingat sa pakikipagkilala online at tiyaking beripikado ang pagkakakilanlan ng isang tao bago makipagkita nang personal. RNT/MDS
