MANILA, Philippines – Nagdala ang House prosecution team ng 15 kahon ng mga dokumento kaugnay ng umano’y confidential funds na inilabas para kay Vice President Sara Duterte sa Senate impeachment court.
Binanggit ni private prosecutor Atty. Lorna Kapunan ang 15 kahon habang tinatawag bilang saksi si Roderick Wamil, dating state auditor ng Commission on Audit (COA) Intelligence and Confidential Funds Audit Office.
“As you can seen in front of you, we have 15 boxes of confidential funds,” sabi ni Kapunan.
“For this witness alone, he will be identifying 50 exhibits,” dagdag pa niya.
Ayon kay Kapunan, ang unang saksi ay magpapatunay sa 845 acknowledgment receipts (ARs) para sa ikaapat na quarter ng 2022 sa ilalim ng Office of the Vice President (OVP).
Ang susunod na saksi naman ay magpapatunay sa 3,664 dokumento, kabilang ang 3,617 ARs.
Ipinaliwanag ni Kapunan na ang mga dokumento ay mga liquidation documents na isinumite mismo ng OVP at ng Department of Education (DepEd) para sa P500 milyong confidential funds ng OVP at P116.5 milyong confidential funds ng DepEd.
Sa Article 1 ng impeachment complaint, inaakusahan si Duterte ng culpable violation of the Constitution, graft and corruption, at betrayal of public trust dahil sa umano’y sistematikong maling paggamit, paglustay, at iregular na liquidation ng kabuuang P612.5 milyong confidential funds ng OVP at DepEd.
Sinabi naman ng depensa, sa pamamagitan ni Michael Poa, na handa silang tanggapin ang listahan ng mga dokumento maliban sa 845 acknowledgment receipts para sa Disyembre 21–31, 2022, dahil may mga isyu pa umanong tatalakayin kaugnay ng mga ito.
“I think it has saved the Senate judges 10 boxes your honor,” ani Kapunan. RNT/MDS (larawan ni Cesar Morales)
