MANILA, Philippines – Pinuri ni Naga City Mayor Leni Robredo nitong Huwebes ang patuloy na suporta ng administrasyong Marcos sa flood mitigation efforts sa lungsod matapos mangako ang Department of Public Works and Highways na ipagpapatuloy ang desilting at paglilinis ng mga daluyan ng tubig sa ilalim ng Oplan Kontra Baha.
Ininspeksyon nina Robredo at DPWH Secretary Vince Dizon ang operasyon sa Sagop Creek sa Barangay Concepcion Pequeña, Naga City, kung saan nagdagdag ng mabibigat na kagamitan ang ahensya.
“With this equipment, this is a huge help to prevent flooding. We can already see the water moving again even with only a small portion cleared. We are hopeful this will reduce flooding in downstream communities that are frequently affected whenever heavy rains occur,” ani Robredo.
Sinabi niya na mahirap nang linisin nang mano-mano ang ilang maliliit na daluyan ng tubig dahil tumigas na ang naipong lupa, sa kabila ng mga naunang operasyon ng City Engineering Office at DPWH Third District Engineering Office.
Nauna nang naglaan ang DPWH ng walong heavy equipment para sa desilting operations sa mga pangunahing daluyan ng tubig, kabilang ang Bicol River, Naga River at Sagop River.
Binigyang-diin ni Robredo ang pangangailangan ng regular na desilting dahil patuloy na naiipon ang sediment na humahadlang sa maayos na daloy ng tubig.
“We have backhoes, but they can only perform desilting from land. There are areas they simply cannot reach. The amphibious equipment will greatly improve our capability to maintain waterways,” aniya.
Sinabi naman ni Dizon na pinaigting ng DPWH ang flood-control operations sa buong bansa upang maging handa ang mga komunidad sa mas malalakas na bagyo.
“I just want to make sure that while stronger typhoons have not yet become more frequent, we are ready,” ani Dizon. “We will continue this effort nationwide.”
Ayon sa kalihim, nakikita na ang epekto ng tuloy-tuloy na flood mitigation projects sa ilang flood-prone areas sa Metro Manila, kung saan mas mabilis nang humuhupa ang baha kumpara noong mga nakaraang taon.
“There is no overnight solution to flooding,” ani Dizon. “What is important is that we continue doing the work properly because sustained efforts produce lasting results.”
Tiniyak ni Dizon kay Robredo na ipagpapatuloy ng pambansang pamahalaan ang Oplan Kontra Baha sa Naga City at iba pang local government units.
“That is our commitment to Mayor Leni, and that is the commitment of our President to the entire country,” dagdag niya. RNT
