MANILA, Philippines – Inaasahang tetestigo ang dalawang dating special disbursing officers (SDO) ng Office of the Vice President (OVP) at Department of Education (DepEd) sa susunod na linggo para sa impeachment trial ni Vice President Sara Duterte, ayon sa House prosecution panel nitong Sabado, Agosto 8.
Ito ang naging pahayag ni Bicol Saro Partylist Representative Terry Ridon, miyembro ng House prosecution team, sa news forum sa Quezon City.
Matatandaan na inatasan ng Senate impeachment court sina OVP SDO Gina Acosta at ex-DepEd SDO Edward Fajarda na tumestigo, sa pagpayag nito sa hiling ng prosecution panel para sa subpoena ad testificandum sa mga witness.
Naunang sinabi ng bank manager na sina Violeta Constantino at Nenita Camposano ng Landbank of the Philippines na sina Acosta at Fajarda ang payees ng confidential fund checks na na-withdraw sa cash.
Ayon kina Constantino at Camposano, ang ganito kalaking cash withdrawals ay hindi pangkaraniwan para sa mga ahensya ng pamahalaan.
“We’re expecting the hostile witnesses, such as Ms. Acosta and Mr. Fajarda to be present there on Wednesday,” ani Ridon.
“Ine-expect namin uulitin nila ang mga under oath testimony nila sa House committee [on justice]… tungkol sa confidential funds use ng Pangalawang Pangulo,” dagdag pa niya.
Sa testimonya noong nakaraang linggo, sinabi ni state auditor Roderick Wamil na ang OVP at DepEd sa pamumuno ni Duterte ay hindi nagpasa ng documentary proof kaugnay sa tamang disbursement ng mahigit P200 milyong halaga ng confidential funds.
Ani Ridon, hindi lamang ang disbursing officers ang dapat na mapanagot kundi maging ang pinuno ng ahensya.
“Ibig sabihin, hindi natin puwedeng iiwas ang Pangalawang Pangulo sa pananagutan sa paggamit ng pera. Hindi natin puwedeng sabihin na Special Disbursement Officer lang ang puwede mong itali sa maling paggamit ng confidential funds… ‘di puwedeng sabihin na accountant lang ‘yung puwede nating itali sa disbursement of confidentual funds,” sinabi pa ng mambabatas.
“Kasi nga sa dulo’t dulo ‘yung paggamit ng pondo kailangan ng pirma ng Head of Agency. Walang perang lalabas, walang cheke na mai-issue kung walang pirma ng Head of Agency,” dagdag niya.
Nauna nang sinabi ni House lead prosecutor Representative Gerville Luistro ng Batangas na bukod kina Acosta at Fajarda, ihaharap din nila si House of Representatives Legislative Information Resources Management Department director Marivic Pareja bilang witness mula Agosto 10 hanggagn 12.
Haharap din ang isa pang prosecution witness na si Supervising State Auditor Xylene Mae del Campo ng Commission on Audit sa susunod na linggo. RNT/JGC
