MANILA, Philippines – Idineklara na ng lokal na pamahalaan ng Dagupan City ang state of calamity sa lungsod dahil sa malawakang pagbaha dulot ng malalakas na pag-ulan dala ng Habagat.
Batay sa Situational Report ng Dagupan City Disaster Risk Reduction and Management Office, nasa 23 barangay pa rin ang nananatiling lubog sa baha.
May kabuuang 22,047 pamilya o 90,015 indibidwal mula sa 31 barangay naman ang apektado.
Samantala, 65 pamilya o 202 indibidwal ang patuloy na tumutuloy sa anim na evacuation center.
“Following the recommendation of the City Disaster Risk Reduction and Management Council, the City Council passed a resolution declaring a State of Calamity to expedite the use of necessary funds and resources for relief, response, rehabilitation, and other immediate needs of residents,” sinabi ni Dagupan Mayor Belen Fernandez.
“This also includes the implementation of price controls on basic necessities and prime commodities, along with strict monitoring to prevent overpricing, profiteering, and hoarding,” dagdag pa niya.
Ani Fernandez, ilan sa mga pangunahing kalsada ang hindi pa rin madaanan ng mga maliliit na sasakyan dahil sa baha.
Patuloy naman na imomonitor ng lokal na pamahalaan ang status ng mga barangay. RNT/JGC
