ILOCOS NORTE, Philippines – Nagbabala ang Department of Health (DOH) Ilocos Center for Health Development (CHD) sa pagtaas ng panganib ng sakit habang patuloy ang malalakas na pag-ulan dulot ng pinalakas na habagat at pagbaha sa rehiyon.
Ayon kay DOH Ilocos Regional Director Dr. Helen D. Tobias, nakahanda na ang emergency response teams, medical personnel, mga gamot, hygiene kits, at water-purification supplies sa Ilocos Norte, Ilocos Sur, La Union, at Pangasinan.
Hinikayat niya ang publiko na mag-ingat laban sa mga “WILD” diseases o Water-borne illnesses, Influenza at iba pang respiratory infections, Leptospirosis, at Dengue, na karaniwang kumakalat tuwing tag-ulan.
Partikular na nagbabala ang DOH laban sa leptospirosis, na maaaring makuha sa paglusong sa baha na kontaminado ng ihi ng hayop.
Pinayuhan ang mga lumusong sa baha na agad hugasan ng sabon at malinis na tubig ang mga bahaging nalantad at magpatingin sa doktor sa loob ng 24 hanggang 48 oras.
Hinikayat din ng DOH ang mga residente sa mga lugar na madalas bahain o magkaroon ng landslide na lumikas kapag inutusan ng mga awtoridad.
Para sa mga nasa evacuation centers, pinayuhan ang mga pamilya na uminom lamang ng ligtas na tubig, panatilihin ang tamang kalinisan, at magsuot ng mask sa matataong evacuation shelters.
Bukas ang DOH Ilocos Emergency Operations Center nang 24 oras bawat araw upang makipag-ugnayan sa mga lokal na pamahalaan at ospital para sa tulong pangkalusugan.
Maaaring iulat ang mga health emergency at pinaghihinalaang disease outbreak sa 0995-865-3945 (Smart) o 0908-873-8451 (Globe). Jocelyn Tabangcura-Domenden
