MANILA, Philippines – Muling nanawagan si House Deputy Minority Leader at ACT Teachers Party-list Representative Antonio Tinio na alisin na ang confidential at intelligence funds, maging ang unprogrammed appropriations sa proposed 2027 national budget.
Sa panayam, sinabi ni Tinio na ang lahat ng nasa national budget ay dapat na maging transparent.
“Yan naman ang panawagan natin ever since, na dapat i-abolish ang confidential and intelligence funds. Wala dapat confidential sa budget, dapat transparent lahat. May mga ibang paraan para pangalagaan yung security concerns sa paggamit ng pondo. Tapos yung pondo na yan ay gamitin para sa, ito na nga, agrikultura, social services, education, and so on,” giit ni Tinio.
Sinabi ni House Appropriations Committee Senior Vice Chairperson at Bataan 2nd district Representative Albert Garcia na naka-depende na sa mga ahensya na binigyan ng naturang pondo para idepensa ang kanilang badyet.
“‘Yung mga ibang agency, nasa mandate nila ‘to, especially yung nagpe-perform to secure our country internally and externally. ‘Yun, maiintindihan natin, baka kailangan nila yung mga ganitong klaseng pondo,” sinabi naman ni Garcia.
Nitong Martes ay kinumpirma ng Department of Budget and Management na mayroong confidential at intelligence funds sa proposed 2027 national budget na nagkakahalaga ng ₱10.773 bilyon.
“Tanging yung mga ahensya na legally authorized [to have] confidential and intelligence functions [have] confidential and intelligence funds under the 2027 National Expenditure Program. And we wish to reiterate that the use of confidential and intelligence funds remains subject to existing budgeting, utilization, liquidation, and auditing rules to ensure accountability and that the funds are used solely for their intended purposes,” pahayag ni Acting DBM Secretary Kim Robert de Leon sa pag-turnover ng proposed budget sa Kamara.
Ayon naman kay Tinio, ang unprogrammed appropriations sa proposed budget ay dapat nang alisin.
“Yan ang posisyon nating matagal na, na actually unconstitutional ang unprogrammed appropriations. In fact, may mga petisyon na nakasalang sa Supreme Court kaugnay niyan. So dapat talaga absolutely zero na yan. Tapos may ibang pamamaraan naman na mas transparent such as yung pag-submit ng mga supplemental appropriations,” paliwanag ni Tinio.
Nauna nang sinabi ng DBM na ang mga item sa unprogrammed appropriations ay mga aktwal na proyekto katulad ng foreign-assisted projects na sinusuri ng Investment Coordination Committee.
Sinabi naman ni House Appropriations Committee Chair at Nueva Ecija 1st district Rep Mikaela Angela Suansing na ang locally-funded infrastructure projects ay hindi na pinapayagan sa ilalim ng unprogrammed appropriations. RNT/JGC
