MANILA, Philippines – Inatasan ni Philippine National Police (PNP) chief Gen. Jose Melencio C. Nartatez Jr. ang lahat ng police unit na makipag-ugnayan muna sa mga awtoridad ng paaralan bago magsagawa ng anumang aktibidad sa loob ng mga eskuwelahan.
Ito ay bilang pagsunod sa bagong guidelines ng Department of Education (DepEd) hinggil sa mga aktibidad ng pulis at pagdadala ng baril sa loob ng school premises upang matiyak ang kaligtasan ng mga mag-aaral.
Ayon kay Nartatez, mahalaga ang koordinasyon upang mapalakas ang child protection at mapalalim ang tiwala ng mga estudyante sa PNP.
“We respect the guidelines issued by DepEd. Our personnel will comply with the requirements on proper attire, coordination and the carrying or display of firearms inside school premises,” ani Nartatez.
“The safety and well-being of our children remain our priority. Police presence in schools should provide a sense of security and partnership, not fear or intimidation,” dagdag niya.
Naglabas ang DepEd Camarines Norte ng Memorandum No. 315, series of 2026, na nag-aatas sa mga pulis, sundalo at iba pang uniformed personnel na magsuot ng Type C uniform o iba pang non-combat attire kapag bibisita sa mga paaralan.
Ipinagbabawal din ang pagdadala o pagpapakita ng mga baril at iba pang armas sa loob ng mga classroom at learning area. Hindi rin pinapayagan ang armed patrols, checkpoints at enforcement operations sa loob ng school grounds.
Sa ilalim ng patakaran ng Camarines Norte, kailangang makipag-ugnayan muna ang mga uniformed personnel sa school head at kumuha ng endorsement mula sa Schools Division Office bago magsagawa ng mga aktibidad.
Kabilang sa mga ito ang safety lectures, anti-drug campaigns, disaster preparedness drills at community outreach activities. RNT/MDS
