MANILA, Philippines — Pormal nang nagsampa ang Department of Justice (DOJ) ng limang kasong kriminal laban kay Marikina City 1st District Rep. Marcelino “Marcy” Teodoro kaugnay ng mga reklamo ng dalawang babaeng pulis na dati niyang close-in security personnel.
Kabilang dito ang apat na counts ng rape through sexual assault at isang count ng acts of lasciviousness, matapos makakita ang mga prosecutor ng probable cause upang dalhin sa korte ang mga reklamo.
Nilinaw ni DOJ spokesperson Atty. Polo Martinez na ang apat na Informations para sa sexual assault ay inihain sa Marikina Regional Trial Court, habang ang acts of lasciviousness case ay isinampa sa Metropolitan Trial Court, na may hurisdiksyon sa naturang offense.
“The cases are now under the court’s jurisdiction and shall proceed in accordance with the Rules of Court for the conduct of trial,” ayon sa DOJ.
Nag-ugat ang mga kaso sa reklamong inihain noong 2025 ng dalawang babaeng pulis na nagsilbing security personnel ni Teodoro sa magkahiwalay na panahon.
Mariing itinanggi ni Teodoro ang mga paratang at iginiit na gawa-gawa at politically motivated ang mga ito. Sinabi naman ng kanyang abogado na handa ang kongresista na harapin ang mga kaso sa korte at patunayan ang kanyang panig.
Kinuwestiyon din ng kampo ni Teodoro ang proseso ng DOJ, at iginiit na ang panel na nagsagawa ng preliminary investigation ay una umanong nagrekomendang ibasura ang mga reklamo bago lumabas ang resolution na nag-utos ng pagsasampa ng kaso. Hindi pa nakapagbibigay ang DOJ ng tugon sa naturang alegasyon sa pinakahuling ulat.
Samantala, ayon sa kopya ng DOJ resolution na iniulat ng ilang news organization, inirekomenda rin ang pagbasura sa hiwalay na perjury complaints ni Teodoro laban sa dalawang complainant dahil sa kakulangan ng ebidensya.
Ang pagsasampa ng mga kaso ay hindi pa katumbas ng hatol, at ang pananagutan ni Teodoro ay pagpapasyahan ng mga korte matapos ang paglilitis. RNT
