MANILA, Philippines – Isinusulong ni Quezon City Councilor Alfred Vargas ang agarang pagtatayo ng permanent evacuation centers sa lahat ng anim na distrito ng lungsod.
Aniya, ang ganitong matutuluyan ay importante sa pagsiguro ng kaligtasan at dignidad ng mga residente tuwing may kalamidad.
Si Vargas ang co-author ng Proposed Ordinance No. 23CC-229, o Quezon City Permanent Evacuation Center (PEC) Ordinance, kasama si Councilor Julienne Alyson Rae Medalla.
Ipinananawagan sa panukala ang pagtatayo ng climate-resilient shelters sa lahat ng anim na legislative districts na kayang matagalan ang malalakas na bagyo at lindol.
Ang bawat pasilidad ay magkakaroon ng family sleeping quarters, hiwalay na palikuran sa mga lalaki, babae at LGBTQ+ residents, community kitchens, laundry hubs, at lactation spaces.
Magkakaroon din ang mga evacuation center na ito ng healthcare at accessibility features katulad ng on-site medical clinics, ramps, Braille signage, at specialized fixtures para sa persons with disabilities (PWDs) at senior citizens.
Isinusulong din sa panukala ang pagtukoy at pagpili ng PEC sites sa pakikipagtulungan sa University of the Philippines Nationwide Operational Assessment of Hazards (UP-NOAH) Center.
Layon nito na masigurong ang mga istruktura ay nasa labas ng high-risk hazard zones at malapit sa key healthcare facilities.
Samantala, pinuri ni Vargas si Quezon City Mayor Joy Belmonte sa flood-control initiatives ng lungsod partikular ang operational detention basins sa Quezon Memorial Circle and G. Araneta, maging ang covered courts na nagsisilbing detention facilities sa Barangay Tatalon at Palmera Homes sa Barangay Sta. Monica.
Nagpapatuloy naman ang karagdagang retention projects sa Barangays Bahay Toro, Sauyo, at Greater Lagro, na inaasahang magbabawas pa sa urban flooding.
“We have come a long way in ensuring the safety and welfare of QCitizens during disasters. However, the Southwest Monsoon, or Habagat, showed that we need long-term solutions to make Quezon City truly disaster-resilient,” ani Vargas.
“Until we reach that point, we must address the immediate, life-saving needs of QCitizens whenever disaster strikes,” dagdag niya. RNT/JGC
