MANILA, Philippines – Nanawagan si Agusan del Norte Lone District Rep. Dale Corvera sa pagbuo ng isang government task force upang tugunan ang tumitinding banta ng karahasan sa mga paaralan sa buong bansa.
Ayon kay Corvera, miyembro ng House Committee on Basic Education and Culture, ipinakita ng mga nakaraang insidente sa Tacloban City at Zamboanga City na hindi na kayang tugunan ng Department of Education (DepEd) lamang ang problema.
“The rising threats on school campuses, including violence, are already beyond the control of one agency,” ani Corvera.
Sinabi niyang maraming dahilan ang school violence at hindi lamang ito nauugnay sa online games, bullying o radicalization. Kabilang din dito ang mga usapin sa seguridad, mental health at disiplina ng mga estudyante.
Dahil dito, iminungkahi ni Corvera ang pagbuo ng task force na pangungunahan ng DepEd at bubuuin kasama ang Philippine National Police (PNP), Department of Health (DOH), at Department of the Interior and Local Government (DILG).
Layunin ng task force na gumawa ng mga hakbang upang maiwasan ang mga pagkakataong magkaroon ng karahasan sa mga paaralan at matiyak ang mas ligtas na learning environment.
“What happened in Zamboanga and Tacloban is also happening in other parts of the world, and it has been alarming to see the number of violent incidents in schools increase drastically,” ani Corvera.
Hinimok niya ang gobyerno na kumilos agad, dahil kung walang mabilis at konkretong aksyon, may posibilidad na magkaroon muli ng panibagong trahedya. RNT/MDS
