₱10,000 CASH GIFT SA SENIOR CITIZENS NA LUMAGPAS NA SA MILESTONE AGE, DAPAT IBIGAY!

MAYNILA — Muling umigting ang panawagan ng mga samahan ng senior citizens sa bansa na rebisahin
at palambutin ang kasalukuyang mga patakaran ng National Commission of Senior Citizens (NCSC)
hinggil sa pamamahagi ng ₱10,000 cash gift sa ilalim ng Republic Act No. 11982 o ang Expanded
Centenarians Act.

Sa gitna ng direktiba ni Pangulong Ferdinand "BBM" Marcos Jr. na agad na irepresenta at ilabas ang mga
naantalang benepisyo para sa mga nakatatanda, nagkaroon ng clarificatory meeting noong August 28,
2026 kasama ang Anti-Red Tape Authority (ARTA), NCSC, concerned LGUs, at ang mga nagreklamong
senior citizens mula sa Barangay Marilag, Quezon City.

May panibagong matinding usapin ang pumutok: ang kapakanan ng mga senior citizen na nasa edad 81
hanggang 84, 86 hanggang 89, 91 hanggang 94, at 96 hanggang 99 na tuluyang nawalan ng
pagkakataong makakuha ng cash gift.

Mga Dahilan ng Pagkalaktaw

Ayon sa iba’t ibang grupo ng senior citizens, marami sa mga nakatatanda ang hindi nakapag-apply sa
mismong taon ng kanilang milestone age (edad 80, 85, 90, at 95) hindi dahil sa ayaw nila, kundi dahil sa
dalawang pangunahing dahilan:

 Kakulangan sa Impormasyon: Maraming senior citizen at kanilang mga pamilya, lalo na sa mga
malalayong komunidad, ang walang sapat na kaalaman ukol sa mga probisyon ng RA 11982 o
kung paano ang tamang proseso ng pagpaparehistro sa NCSC database.

 Mabigat na Karamdaman: Karaniwan sa mga nakatatandang umaabot sa ganitong edad ang
may kapansanan, bedridden, o may malubhang sakit na nagiging balakid upang sila ay
makalakad at makapag-asikaso ng mga kinakailangang dokumento sa loob ng nakatatakdang
taon.

“Retroactive”; Restriction: Pondo na, Naging Bato Pa?

Sa ilalim ng umiiral na Implementing Rules and Regulations (IRR) ng NCSC, itinatakda na ang cash gift ay
dapat ma-claim sa loob lamang ng isang taon mula sa kaarawan ng senior citizen sa kaniyang milestone
age. Kapag lumagpas na rito at naging edad 81, 86 0 91 na ang benepisyaryo, itinuturing na itong
ineligible o hindi na pwedeng makatanggap nang retroactive payout.

Matinding pagkadismaya ang idinudulot nito sa mga pamilya ng nakatatanda. Giit ng mga
tagapagtanggol ng karapatan ng senior citizens, nakalaan at nakatabi na ang pondo mula sa pambansang
badyet para sa mga benepisyaryong ito. Kung ang layunin ng batas ay magbigay ng pagkilala at tulong-
pinansyal sa mga nakatatanda habang sila ay nabubuhay pa, hindi dapat maging dahilan ang mga
teknikalidad sa edad o pagkakagambala ng aplikasyon upang ipagkait sa kanila ang benepisyong
nararapat para sa kanila.

Panawagan sa NCSC at sa Malacañang

Umapela ang mga grupo ng nakatatanda na magkaroon ng humanitarian exception o flexibility sa mga
alituntunin. Kung mapapatunayan naman sa pamamagitan ng opisyal na dokumento at rehistro ng LGU
o OSCA na ang isang senior citizen ay tunay na umabot sa edad 80, 85, 90, at 95 at hindi lamang
nakapag-apply dahil sa sakit o kawalan ng kaalaman, dapat pa ring maipagkaloob sa kanila ang
nakalaang ₱10,000.

Sa huli, ang tulong-pinansyal na ito ay hindi lamang basta pera, ito ay simbolo ng respeto,
pagpapahalaga, at pagkalinga ng pamahalaan sa mga Pilipinong inialay ang kanilang kabataan para sa
bansa.