MANILA, Philippines – Nagsampa ang Office of the Ombudsman ng mga kasong kriminal laban kay dating Bureau of Fire Protection (BFP) Fire Director Jesus P. Fernandez kaugnay ng P485-milyong procurement ng 132 ambulansya.
Ayon sa Ombudsman, nahaharap si Fernandez sa dalawang counts ng indirect bribery at dalawang counts ng paglabag sa Section 3(b) ng Republic Act No. 3019 o Anti-Graft and Corrupt Practices Act.
Nag-ugat ang kaso sa reklamo ng Department of the Interior and Local Government (DILG) matapos ang fact-finding investigation ng Task Force BFP Accountability sa pagbili ng 132 Type 1 Basic Life Support ambulances.
Iginawad ang kontrata sa Toyota Mabolo, na nakipag-joint venture sa Autozone Prime Distributors Inc.
Kinasuhan din si Rosaverna P. Sangga, kinatawan umano ng joint venture, ng dalawang counts ng Corruption of Public Officials sa ilalim ng Article 212 ng Revised Penal Code.
Batay sa imbestigasyon ng Ombudsman, umano’y tumanggap si Fernandez ng kabuuang P14.75 milyon mula kay Sangga habang may mahalagang papel siya sa procurement process.
Sa hiwalay na administrative case, napatunayang guilty si Fernandez ng grave misconduct at conduct prejudicial to the best interest of the service.
Kabilang sa ipinataw na parusa ang dismissal from service, cancellation of eligibility, forfeiture of retirement benefits at perpetual disqualification mula sa muling pagtatrabaho sa gobyerno.
Ayon sa Ombudsman, ang umano’y pagtanggap ng pera ni Fernandez habang nagsisilbing BFP chief at chairman ng Bids and Awards Committee ay salungat sa tungkulin at integridad na inaasahan sa kanyang posisyon. Santi Celario
