MANILA, Philippines – Nananatiling baha ang ilang bahagi ng North Luzon Expressway (NLEX) sa San Simon, Pampanga ngayong Biyernes, Setyembre 4, dahilan upang maging limitado ang mga lane na maaaring daanan ng mga motorista.
Batay sa 7 a.m. advisory ng NLEX Corp., may water buildup sa lahat ng northbound at southbound lanes sa San Simon Interchange.
Tanging unang lane sa magkabilang direksyon ang maaaring daanan ng lahat ng uri ng sasakyan. Ang second lanes naman ay para lamang sa Class 2 at Class 3 vehicles, habang hindi madaanan ang third lanes.
Nakapagtala rin ng humigit-kumulang 200 metrong traffic buildup sa southbound at 50 metro sa northbound bahagi ng San Simon Interchange.
May water buildup din sa Tulaoc area. Passable sa lahat ng sasakyan ang first at second lanes sa northbound at southbound, habang hindi madaanan ang third lanes.
Samantala, passable sa lahat ng uri ng sasakyan ang Sta. Rita northbound entry, Balagtas northbound entry, Pulilan northbound lanes, gayundin ang southbound lanes sa Balintawak at Valenzuela.
Pansamantalang sarado naman ang Libtong Exit sa Meycauayan, Bulacan.
Patuloy na pinapayuhan ang mga motorista na bantayan ang pinakahuling traffic advisories ng NLEX bago bumiyahe dahil maaaring magbago ang kondisyon ng mga kalsada bunsod ng patuloy na pag-ulan. RNT
