NLEX, MMDA nagsanib vs pagbaha

MANILA, Philippines – NAGTULONG ang North Luzon Expressway (NLEX) at ang Metropolitan Manila Development Authority (MMDA) para masolusyunan na ang problema sa pagbaha sa pangunahing lansangan patungong Hilagang Luzon.

Ayon sa NLEX, naglagay na sila ng mga harang at nagtambak ng mga sako ng buhangin sa mga bahaging apektado ng baha o binabaha bago pa dumating ang mga panibagong malalakas na pag-ulan at pag-apaw ng mga ilog.

Dahil lumampas sa inaasahan ang tindi ng pag-ulan, nagdagdag din ang ahensya ng mas malalakas na makinang panghigop ng tubig na inarkila, bukod sa sarili nitong mga gamit.

Nagsagawa rin ng paghahanda ng mga imbakan at pagtutuwid ng daluyan ng tubig sa San Simon at Tulaoc, Pampanga upang hindi bahain ang daanan ng mga sasakyan.

Patuloy ring isinasagawa ang pamamahala sa daloy ng trapiko sa pamamagitan ng paghahanda ng mga alternatibong daan at pagbibigay ng paalala sa mga motorista. May mga nakapwesto na rin silang mga tauhan sa Meycauayan, Paso de Blas, San Fernando, at Balintawak para sa mabilis na pagtugon.

Sa pagtutulungan, patuloy na nakikipag-ugnayan ang NLEX sa DPWH, DOTr, Toll Regulatory Board, Northern Luzon Command, Philippine Coast Guard, at sa mga lokal na pamahalaan ng lalawigan ng Pampanga.

Sa panig ng MMDA, nagpadala ito ng mga gamit at tauhan sa San Simon at Tulaoc upang makatulong sa mga tauhan ng NLEX mula nang magsimula ang pagbaha noong Agosto 29, 2026. Kabilang sa ipinadala ang mga yunit ng pagbomba, mga harang, mga trak, at mga kawani. RNT