MANILA, Philippines – Nais ng Department of the Interior and Local Government (DILG) na lahat ng pulis ay marunong magmaneho ng sasakyan at motorsiklo.
Ayon kay DILG Secretary Jonvic Remulla, kalahati lamang sa halos 220,000 tauhan ng Philippine National Police (PNP) ang marunong magmaneho.
“Nakakagulat. Hindi pala lahat ng pulis marunong magmaneho,” ani Remulla.
“It hinders performance and we have to change that,” dagdag niya matapos ang turnover ng 20 motorsiklo sa Camp Delgado nitong Setyembre 9.
Aniya, hindi magiging lubos ang silbi ng Unified 911 emergency response kung hindi agad makaresponde ang mga pulis dahil hindi sila marunong magmaneho kahit may available na sasakyan.
Dahil dito, maglalabas ang DILG ng memorandum na mag-aatas sa mga bagong aplikante sa PNP simula sa susunod na taon na marunong magmaneho ng four-wheeled at two-wheeled vehicles. RNT/MDS
