MANILA, Philippines – Maaaring hilingin ni Vice President Sara Duterte na alisin ang security detail na ipinagkakaloob sa kanya ng Armed Forces of the Philippines (AFP), ayon kay Defense Secretary Gilberto Teodoro Jr.
Sinabi ito ni Teodoro matapos sabihin ni Duterte noong Setyembre 5 na hindi siya nagtitiwala sa pulisya, korte at maging sa security team na nakatalaga sa kanya.
“Karapatan naman niyang i-request na i-withdraw. So, iwanan na lang natin doon. Kasi ang sundalo naman, nasabi ko na nga, mission trained yan, wala namang personalan yun eh,” ani Teodoro nitong Huwebes, Setyembre 10.
Wala pa aniyang natatanggap na kahilingan mula kay Duterte para alisin ang kanyang security detail.
Ayon kay Teodoro, maaari ring kumuha ang Bise Presidente ng sarili niyang pribadong seguridad. Ang AFP security ay itinuturing na courtesy at privilege at maaaring ipatanggal kung nawala ang tiwala at kumpiyansa.
Nagsalita si Duterte tungkol dito bago siya magpiyansa sa Quezon City Regional Trial Court, na naglabas ng warrant of arrest laban sa kanya kaugnay ng tatlong kaso ng grave threats. RNT/MDS
