MANILA, Philippines – Hihilingin ng House prosecution panel sa Senate impeachment court na ituring si Davao City Mayor Sebastian “Baste” Duterte bilang isa pang hostile witness sa impeachment trial ng kanyang kapatid na si Vice President Sara Duterte.
“We will ask the court to declare him as a hostile witness,” sinabi ni House prosecution panel spokesperson Benjamin Tolosa Jr. sa news forum nitong Sabado, Setyembre 19.
Noong Miyerkules, inanunsyo ng Senate impeachment court ang pag-iisyu ng subpoena kay Baste para sa impeachment trial ng kapatid.
“Tama po kasama siya sa mga witneses na naakalista sa issuance of subpoena na sinumite ng prosecution. Pinapatawag natin siya bilang testigo dahil main reason siya ang mayor ng City of Davao at nakita natin sa SALN (State of Assets Liabilities and Net Worth) ng bise merong iba-ibang kumpanya nakadeklara na meron siyang financial interest… [such as] Gencorp Industries. Gusto nating makita kung nagkaroon ng any dealings ang kumpanyang ito with the city government,” ani Tolosa.
Kasalukuyang tinatalakay ng impeachment court ang Article II ng Articles of Impeachment, sangkot ang umano’y unexplained wealth ng Bise Presidente.
Bagamat idedeklarang hostile witness si Baste ay maaari pa ring magtanong ang prosekusyon ng “leading questions” na maaaring sagutin ng “yes or no.” RNT/JGC
