MANILA, Philippines – Patuloy na lumalaki ang investment sa Association of Southeast Asian Nations (ASEAN), na nakapagtala ng $243.9 bilyon na foreign direct investments (FDI) noong 2025, ayon sa Department of Trade and Industry (DTI).
Ayon sa DTI, ito na ang pinakamataas na FDI na natanggap ng rehiyon sa kasaysayan at ikalimang sunod na taon na lumampas sa $200 bilyon ang annual FDI inflows ng ASEAN.
Sinabi ni DTI Undersecretary Ceferino Rodolfo na sa kabila ng mga hamon sa global economy, patuloy na nakaaakit ang ASEAN ng investments sa manufacturing, electronics at digital industries.
“ASEAN continues to stand out as one of the world’s most dynamic and attractive investment destinations,” ani Rodolfo.
Dagdag niya, lalo pang pinatatatag ng ASEAN ang posisyon nito bilang mahalagang hub sa global value chains.
“ASEAN remains competitive and future ready,” ani Rodolfo.
Kasabay nito, pinag-uusapan ng mga economic minister ng ASEAN ang mga hakbang upang mas mapalakas ang posisyon ng rehiyon sa green at digital transitions, gayundin sa iba pang industriya.
Layunin din ng mga bansa na hindi lamang paramihin ang investment kundi makahikayat ng mga negosyong nagdadala ng innovation at lumilikha ng de-kalidad na trabaho.
Isinasagawa sa Maynila ang ASEAN Economic Ministers Meetings bilang bahagi ng chairship ng Pilipinas sa ASEAN ngayong 2026. RNT/JGC
