MANILA, Philippines – Apatnapu’t siyam na food services contracts ang iginawad ng mga tanggapan ng gobyerno sa Davao Region sa isang korporasyong na pag-aari ni Vice President Sara Duterte, ayon sa isang opisyal ng Philippine Government Electronic Procurement System (PhilGEPS) nitong Martes.
Sa impeachment trial nitong Martes, sinabi ni PhilGEPS Electronic Government Procurement Operations Division chief Rendell Sopeña na kabuuang P35,878,188 ang iginawad sa Gencorp Industries Inc. sa kanyang testimonya hinggil sa mga kompanya ni Duterte.
“We searched the repository, or the procurement database based on the merchant Gencorp Industries Inc. and upon search po na ginawa namin sa procurement database, it resulted to 49 contracts awarded to Gencorp Industries Inc.,” ani Sopeña.
Idineklara ni Duterte ang sarili bilang stockholder ng Gencorp Industries Inc. sa kanyang statement of assets, liabilities and net worth (SALN) noong 2016 nang ang korporasyon ay Timesquare Bee Foods Corp. pa ang pangalan.
Ayon kay Sopeña, iginawad ang mga kontrata sa Gencorp noong panahon ng pagiging bise presidente ni Duterte.
Isang kontrata na nagkakahalaga ng P331,000 ang iginawad ng Overseas Workers Welfare Administration Region 11, 15 kontrata na nagkakahalaga ng P34,216,900 ang iginawad ng City of Davao, at ang natitirang 33 kontrata na nagkakahalaga ng P1,331,288 ay mula sa Philippine Health Insurance Corporation – Region 11. Ernie Reyes/larawan kuha ni CESAR MORALES
