MANILA, Philippines – Inaasahan ng House prosecution panel na magpapatuloy ang impeachment trial ni Vice President Sara Duterte sa kabila ng dalawang petition na inihain sa Supreme Court laban sa ruling ng Senate impeachment court sa voting threshold para sa conviction.
Magkahiwalay na hiniling nina lawyers Vic Rodriguez at Ernesto Francisco Jr. sa Supreme Court na makialam sa ruling noong Setyembre 23, kung saan itinakda ang two-thirds vote batay sa mga senator-judge na legal at aktuwal na makalalahok sa proceedings, sa halip na fixed na 16 votes.
Ayon kay House lead prosecutor Rep. Gerville Luistro, inaasahan na ng prosecution ang mga petition.
“This is no surprise to us. Sobrang anticipated namin na mayroong aakyat sa Supreme Court to question the ruling of the Honorable Impeachment Court on the interpretation of the denominator,” ani Luistro.
Iginiit ni Luistro na hindi binago ng impeachment court ang constitutional requirement na two-thirds vote.
“The Honorable Impeachment Court did not change the threshold. ‘Ika nga nung kasama namin si Congressman Chel Diokno, two-thirds is two-thirds,” aniya.
Sinabi niyang binigyang-kahulugan lamang ng Senate impeachment court ang pariralang “all members of the Senate” dahil sa hindi pangkaraniwang sitwasyon ng kasalukuyang impeachment court, kung saan may mga senator-judge na hindi makalahok sa proceedings.
Ayon sa ruling, hindi isasama sa denominator ang mga senador na detained o suspended, physically o medically incapacitated, wala sa saklaw ng coercive power ng Senado, o hindi kayang lumahok sa proceedings.
Naniniwala rin ang prosecution na saklaw ng exclusive constitutional power ng Senado na mag-try at magdesisyon sa impeachment cases ang pag-interpret sa voting threshold.
“By trying, it includes interpreting the rules with respect to the threshold vote,” ani Luistro.
Binigyang-diin din niya na ang ruling ay para lamang sa kasalukuyang kaso at hindi awtomatikong magiging precedent sa mga susunod na impeachment proceedings.
“Very significant ‘yung qualification ng ating impeachment court. Ibig sabihin, for that particular occasion only, and this will not serve as a precedent,” aniya.
Sa ngayon, sinabi ni Luistro na hindi niya inaasahang muling bubuksan ang usapin sa voting threshold kapag dumating na ang botohan.
“I think it’s final already,” ani Luistro. “So to your question, pwede pa ba ‘yung mabuksan at mapag-usapan, I don’t think. My answer is no.”
Gayunman, sinabi niyang maaaring suriin ng Supreme Court ang usapin sa limitadong pagkakataon, gaya ng may alegasyon ng grave abuse of discretion amounting to lack or excess of jurisdiction.
Dalawang petition na ang nakahain sa Supreme Court: si Rodriguez ay humihiling na ipawalang-bisa ang September 23 ruling at maglabas ng temporary restraining order, habang si Francisco ay humihiling ng status quo ante order.
Samantala, sinabi ni Senate President Sherwin Gatchalian na magpapatuloy ang impeachment trial maliban na lamang kung maglalabas ang Supreme Court ng utos na magpapahinto sa proceedings. RNT/MDS
