NLAP babantayan LPG swapping guidelines, humihiling ng patas na patakaran

MANILA, Philippines — Sinabi ng National LPG Alliance of the Philippines Inc. (NLAP) na babantayan nito ang pagbuo ng guidelines para sa LPG Cylinder Swapping Centers upang matiyak, ayon sa grupo, na hindi ito magbibigay ng hindi patas na bentahe sa ilang malalaking kumpanya.

Ayon kay NLAP President Jose “Jojo” Cruz, nais ng grupo na matiyak na ang magiging panuntunan ay naaayon sa Republic Act No. 11592 o LPG Industry Regulation Act at isinasaalang-alang ang kapakanan ng independent LPG dealers, refillers at consumers.

“Naniniwala ako na may mas malalim na dahilan kung bakit ‘excited’ ang ilang kumpanya na tuluyang mabuo ang nasabing guidelines dahil sa posibleng monopolyo ng LPG sa bansa,” ani Cruz.

Ang posibilidad ng monopolyo ay pangamba at posisyon ng NLAP at hindi pa napatunayang epekto ng proposed guidelines.

Ayon sa NLAP, nakatakda sa Setyembre 29 ang preparatory meeting na ipinatawag ng Oil Industry Management Bureau (OIMB) ng Department of Energy (DOE), kung saan inaasahang tatalakayin ang pinakabagong draft guidelines para sa pagtatatag at operasyon ng LPG Cylinder Swapping Centers.

Sa ilalim ng RA 11592, inaatasan ang DOE at Department of Trade and Industry na bumuo ng mga patakaran para sa LPG Cylinder Exchange and Swapping Program at LPG Cylinder Improvement Program. Nakasaad din sa batas ang layuning mapanatili ang karapatan ng consumers na malayang pumili ng LPG brand at mapahusay ang kompetisyon sa industriya.

Nauna nang nagpahayag ang NLAP at iba pang LPG industry groups ng pagtutol sa ilang bahagi ng proposed swapping-center guidelines at nanawagan ng mas malawak na konsultasyon sa stakeholders.

Iginiit ni Cruz na dapat tiyakin sa pagbuo ng guidelines na mapoprotektahan ang consumer choice at hindi magkakaroon ng hindi patas na epekto sa mas maliliit na kalahok sa industriya.

“Hindi natin hahayaang umabot sa ganoong punto ang sitwasyon,” ani Cruz.

Samantala, ang umiiral na DOE-DTI framework para sa cylinder exchange at swapping ay nagsasaad na layunin ng programa na bigyan ang consumers ng kalayaang pumili ng LPG-filled cylinders at tiyaking ligtas na cylinders lamang ang nasa merkado. RNT