MANILA, Philippines – Nanawagan si Sen. Risa Hontiveros nitong Biyernes, Oktubre 2 ng agarang pagpapalaya kay Mark Mabasa, anak ng pinaslang na broadcaster na si Percy Lapid, matapos itong arestuhin ng mga ahente ng US Immigration and Customs Enforcement o ICE sa California.
Hanggang ngayon ay wala pang malinaw na dahilan sa pagkaka-detain kay Mark.
“It is unacceptable that a person who has been seeking asylum is detained without a clear reason. Matagal nang nag-apply ng asylum si Mark at ang iba pang myembro ng pamilya ni Percy Lapid pagkatapos ng katakot-takot na mga death threats dito sa Pilipinas. Our government should be able to help expedite his release as soon as possible,” sabi ni Hontiveros.
Nauna nang inilantad ni Hontiveros sa isang Senate press conference noong 2022 ang mga natanggap na death threat ng pamilya Mabasa mula sa hindi kilalang tumawag.
Dito rin niya binanggit ang pagkakaugnay noon ng suspended Bureau of Corrections chief na si Gerald Bantag sa pagpatay kay Lapid.
Ayon sa senadora, naiparating na niya ang kaso ni Mark kina Philippine Ambassador to the US Jose Manuel “Babes” Romualdez, US Ambassador to the Philippines Lee Lipton, at Philippine Consul General in Los Angeles Adel Cruz.
Hinikayat din niya ang Malacañang at lahat ng kaukulang ahensya na tumulong sa pamilya Mabasa.
“The government had already failed to protect Percy’s life. The least we can do now is ensure that our citizens are safe wherever they are in the world,” dagdag ni Hontiveros.
“The Mabasa family has endured enough. It is exactly four years since Ka Percy was killed, but instead of receiving justice, they are made to suffer again. We should not retraumatize a family that has already lost so much. Kailangan nilang maramdaman na hindi sila nag-iisa, dito man o sa ibang bansa,” pagtatapos ng senadora. Ernie Reyes
