MANILA, Philippines- SINABI ni Pangulong Ferdinand Marcos Jr. na ang kanyang pagbisita sa Singapore ay makatutulong sa paghahanda ng industriya ng Pilipinas para sa hinaharap.
Dumating ang Pangulo sa Singapore para sa five-day working visit nito, Miyerkules ng gabi sa Changi Airport ng alas- 11:05 ng gabi.
“Our objective is not simply to attract investments today. We must ensure that we have the elements that are needed to sustain them in the years ahead,” ang sinabi ng Pangulo sa kanyang departure statement.
“I return to Singapore with a clear purpose: to build on one of our most important economic partnerships and prepare our country for the industries of the future,” aniya pa rin.
Ayon sa Pangulo, ang pinakabagong pagbisita nya sa Singapore ay nabuo sa nakalipas niyang byahe sa bansa noong Hulyo, kung saan nakausap niya ang mga investors sa digital infrastructure, artificial intelligence (AI), healthcare, at marami pang iba.
Sinabi pa ng Pangulo na ang kanyang pagbisita ay may mas malawak na pokus ngayon, dahil nakatakda rin siyang dumalo sa Forbes Global CEO Conference. Sa nasabing event, winika ng Pangulo na ipepresenta niya ang Pilipinas sa mga investors para sa mga oportunidad sa digital technology, AI, at advanced manufacturing.
Nakatakda ring bisitahin ng Pangulo ang Singapore Nuclear Research sa imbitasyon na rin ng Temasek Foundation and Ayala Corporation.
“The Philippines must continue to examine all viable options for our long-term energy security, while developing the knowledge and capabilities needed to make sound decisions for our future,” ayon sa Pangulo.
Samantala, kabilang sa pagbisita ng Pangulo sa Singapore ang inaasahang pagdalo niya sa Formula 1 race, na ayon kay Philippine Ambassador to Singapore Medardo Macaraig ay hindi babayaran ng Filipino taxpayers.
Hindi naman kinumpirma ng Malakanyang kung manonood ang Pangulo ng sporting event, pinanatili nito na ang kanyang pagdalo sa race ay maaaring makapag-presenta ng economic investment opportunities para sa Pilipinas. KRIS JOSE
