MANILA, Philippines — Humingi ng paumanhin si private prosecutor Atty. Lorna Kapunan kay Vice President Sara Duterte’s lead defense counsel Atty. Sheila Sison matapos niya itong tawaging “bully,” at sinabing ang bise presidente umano ang dapat niyang tinutukoy.
“Hindi naman siya ang bully. Ang talagang bully is the Vice President. She is the real bully,” ani Kapunan sa isang online interview nitong Huwebes.
Nauna rito, dinepensahan ni Duterte si Sison matapos akusahan ni Kapunan ang defense lawyer ng pambubully at kawalan umano ng respeto sa prosecution at senator-judges kaugnay ng pagtawag ng depensa sa impeachment proceedings bilang “persecution.”
Ayon kay Duterte, ang pagtawag kay Sison na bully ay maihahalintulad sa pagturing kay David bilang aggressor laban kay Goliath, at inilarawan niya itong paraan upang siraan ang isang abogadong humaharap umano sa “overwhelming display of political power.”
Iginiit naman ni Kapunan na si Duterte umano ang nang-aaway sa iba’t ibang institusyong sangkot sa impeachment trial.
“She’s bullying the senator-judges… She’s bullying the prosecutors. She’s bullying the House,” ani Kapunan.
Kalaunan ay binawi niya ang naunang bansag kay Sison at sinabing ginagawa lamang ng mga abogado ng depensa ang kanilang trabaho.
“Apologies to Atty. Sheila. They’re just doing their job as lawyers,” ani Kapunan.
Patuloy ang impeachment trial laban kay Duterte, kung saan Article II na lamang—kaugnay ng alegasyon sa kanyang assets, business interests at unexplained wealth—ang ipinagpapatuloy ng prosecution matapos bawiin ang tatlo pang articles of impeachment. RNT
