TARLAC, Philippines — Nilinaw ni DOST Secretary Renato Solidum Jr. nitong Huwebes na walang itatayong data center sa New Clark City, Tarlac, kaugnay ng US-led Pax Silica program.
“We should understand that this Pax Silica program of the United States has many components. It has a component that manufacture chips and semiconductors that will be used later on in the development of data centers or artificial intelligence hubs. (But) it is not a data center,” ani Solidum.
“There will be no data center to be put up there,” dagdag niya.
Sa halip, planong magtayo ng advanced manufacturing centers para sa paggawa ng chips at semiconductors na ginagamit sa artificial intelligence (AI) at iba pang kagamitang kailangan sa pagpapatakbo ng data centers.
Ayon kay Solidum, tinawag ng Bases Conversion and Development Authority (BCDA), na namamahala sa lugar, ang proyekto na Clark Advanced Manufacturing Park dahil nakatuon ito sa produksyon ng AI chips at iba pang kaugnay na kagamitan.
Dagdag niya, kailangang sumunod ang mga manufacturing center sa Pilipinas sa mga pamantayang itinakda ng mga ahensiya ng pamahalaan, kabilang ang Department of Environment and Natural Resources (DENR).
Nasa Mindanao si Solidum para sa Regional Science, Technology and Innovation Week (RSTW) 2026. Tampok sa aktibidad ng Department of Science and Technology ang paggamit ng agham, teknolohiya at inobasyon para sa kaunlaran ng mga rehiyon at bansa.
May 48 exhibitors ang naturang event at bukas ito sa publiko hanggang Sabado, Oktubre 17. RNT/MDS
