MAKATI CITY, Philippines — Limang babae ang inaresto matapos salakayin ng mga awtoridad ang isang Philippine Offshore Gaming Operator (POGO) hub sa Barangay Bel-Air noong Huwebes, Oktubre 15.
Ayon sa Criminal Investigation and Detection Group (CIDG), kabilang sa mga naaresto ang supervisor ng operasyon at ang taong tinukoy sa search warrant. Nahuli ang mga suspek habang aktibo ang offshore gaming operations sa loob ng gusali.
Pinangunahan ng CIDG National Capital Region Field Unit ang operasyon kasama ang Presidential Anti-Organized Crime Commission (PAOCC), PNP Anti-Cybercrime Group, Philippine Air Force, Armed Forces of the Philippines Military Intelligence and Digital Forensic Unit, at Makati City Police Station.
Nagsilbi ang mga awtoridad ng Warrant to Search, Seize, and Examine Computer Data kaugnay ng umano’y paglabag sa Section 4(a) ng Republic Act No. 12312 o Anti-POGO Act of 2025.
Nasamsam sa raid ang 13 computer system unit, 50 monitor, 29 cellphone, limang laptop, network video recorder, digital video recorder, USB flash drive, hard drive, modem router, online betting cards at mga SIM card.
Binigyang-diin ni CIDG Director PMGEN Robert Morico II na ipatutupad ng pamahalaan ang batas laban sa mga ilegal na operasyon.
“The State recognizes that the maintenance of peace and order, the protection of life, liberty, and property, and the promotion of the general welfare are paramount for the meaningful enjoyment of democracy,” ani Morico.
“To this end, pursuant to Republic Act No. 12312 (Anti-POGO Act of 2025), offshore gaming operations in the Philippines are hereby banned and declared unlawful,” dagdag niya.
Ayon sa CIDG, bahagi ng direktiba ni Pangulong Ferdinand Marcos Jr. ang tuluyang pagpuksa sa POGO at Internet Gaming Licensees (IGLs) sa bansa. Nagbabala rin ang ahensiya sa mga operator, financier at protector ng mga ilegal na operasyon na itigil ang kanilang gawain o haharap sa kaukulang aksiyon ng batas.
Hindi pa inilalabas ng CIDG ang pagkakakilanlan ng mga naarestong babae habang inihahanda ang mga kasong isasampa laban sa kanila. RNT/MDS
