MANILA, Philippines – Nag-utos si Agriculture Secretary Francisco P. Tiu Laurel Jr. sa Inspectorate and Enforcement office ng Department of Agriculture (DA) at sa Bureau of Plant Industry (BPI) na magsagawa ng imbestigasyon kaugnay sa umano’y pagpupuslit (smuggling) ng carrots, broccoli, at iba pang gulay mula sa kabundukan.
Ginawa ito dahil sa pangamba na ang hindi patas na kompetisyon ay nakapipinsala sa mga magsasaka, partikular na sa Cordillera.
Ang kautusan ay kasunod ng mga operasyon sa pagsubaybay sa Baguio City at La Trinidad, Benguet, kung saan natuklasan ng mga awtoridad na may mga imported o hinihinalang puslit na broccoli na ibinebenta kasabay ng mga lokal na ani.
Sinabi sa ulat ng DA-Cordillera na may petsang Oktubre 15, tatlong puwesto sa Baguio Hangar Market ang nagbebenta ng imported na broccoli. Sa isa sa mga puwestong ito, may nakitang styrofoam box na may tatak na “Product of China.”
Batay sa mga panayam sa mga nagbebenta at distributor, nasa 50 kahon ng broccoli na nagkakahalaga ng humigit-kumulang P1,250 bawat isa, ang kinukuha umano mula sa isang supplier sa Santo Cristo, Divisoria, tuwing ikalawang araw.
Ang mga gulay ay dinadala gamit ang mga trak ng gulay na bumabalik mula sa Maynila.
Nabatid na nasa P170 hanggang P250 kada kilo ang presyo sa mga lugar na binantayan, ayon sa ulat.
Hindi pa matiyak ng mga awtoridad kung ang mga gulay ay tunay ngang ipinuslit papasok sa bansa.
“Aalamin namin ang katotohanan sa likod nito, at kung mapapatunayang may paglabag sa Anti-Agricultural Economic Sabotage Law, sisiguraduhin naming mapaparusahan ang mga lumabag,” pahayag ni Tiu Laurel.
Ang mga tinukoy na pinagmulan at sistema ng pamamahagi ay sasailalim pa sa beripikasyon.
Dahil sa pagkakaroon ng mga imported o hinihinalang puslit na broccoli sa mga pamilihan, nakatanggap ang monitoring team ng mga reklamo mula sa mga tagapamahala ng merkado hinggil sa hirap na ibenta ang mga lokal na ani.
May mga mamimili umanong mas pinipili ang mas murang imported na produkto, na nagdaragdag sa pasanin ng mga magsasaka sa Benguet.
Kaugnay nito ay inirekomenda ng DA-Cordillera ang pagsasagawa ng magkasanib na inspeksyon ng DA-IE at BPI sa mga pangunahing sentro ng kalakalan sa Metro Manila, CALABARZON, at Central Luzon.
Layunin nito na suriin ang mga dokumento ng pag-aangkat (import documents), pagsunod sa mga panuntunan sa plant quarantine, at mga pamantayan sa kaligtasan ng pagkain.
Bukod dito, hinihimok din nito ang pakikipagtulungan ng mga ahensya sa Kagawaran ng Interyor at Lokal na Pamahalaan (DILG) at Kagawaran ng Kalakalan at Industriya (DTI), upang palakasin ang koordinasyon sa mga lokal na yunit ng pamahalaan at mga stakeholder sa merkado sa pagsubaybay sa lokal na pamilihan at pagpapatupad ng wastong paglalagay ng presyo at paglalagay ng label ng produkto.
Sa isang pulong ng koordinasyon na isinagawa ng task force ng Lalawigan ng Benguet noong Setyembre, iniharap ng DA-Cordillera ang mga pinagsamang ulat ng pagsubaybay at tinalakay ang mga alalahanin sa marketing kasama ang DTI kasabay ng pagpapatupad ng Consumer Act of the Philippines.
Samantala, humingi rin ito ng tulong at nakipagtulungan sa DILG para sa magkasanib na interbensyon sa lokal na pamamahala kaugnay ng pagkakaroon ng mga inangkat o umano’y ipinupuslit na produktong agrikultural. Santi Celario
