MANILA, Philippines – Iniutos ni Philippine National Police (PNP) chief Police General Jose Melencio Nartatez Jr. sa mga yunit ng pulisya na gamitin nang husto ang teknolohiya at intelligence resources upang matunton ang mga wanted person at mapigilan silang makatakas palabas ng bansa sa pamamagitan ng mga baybaying lugar.
Inatasan ni Nartatez ang mga kinauukulang yunit na paigtingin ang intelligence operations sa mga border at tukuyin ang posibleng rutang ginagamit ng mga pugante, partikular sa mga baybaying komunidad at kilalang maritime exit points.
Layunin ng direktiba na mapahusay ang pagtukoy at paghahanap sa mga wanted person na maaaring magtangkang umiwas sa pag-aresto sa pamamagitan ng mga hindi awtorisadong ruta palabas ng bansa.
“The Philippine National Police must continue investing in intelligence-driven technologies, real-time information sharing, and integrated monitoring systems that allow us to track fugitives and criminal networks across jurisdictions,” pahayag ni Nartatez.
Dagdag niya, makatutulong ang mas mahusay na data analytics, surveillance capabilities at koordinasyon ng mga law enforcement agency upang mapigilan ang mga kriminal na gumagamit ng rutang pandagat at iba pang labasan ng bansa.
Bahagi ang hakbang ng mas malawak na pagsisikap ng pamahalaan laban sa mga transnational crime, kabilang ang drug trafficking, human trafficking at mga operasyon ng online scam sa rehiyon ng ASEAN.
Binigyang-diin ni Nartatez na mananagot pa rin sa batas ang mga pugante kahit makaalis sila ng bansa.
“Leaving the country does not erase a crime, nor does crossing a border place anyone beyond the reach of the law,” aniya.
Ayon sa hepe ng PNP, gagamitin ng organisasyon ang lahat ng legal na paraan at makikipagtulungan sa mga dayuhang awtoridad upang matiyak na mahaharap sa hustisya ang mga wanted person. RNT/MDS
