MANILA, Philippines – Ilang lugar sa bansa ang nagsuspinde ng face-to-face classes nitong Miyerkules, Oktubre 28, dahil sa mga alalahanin sa kalusugan at paghahanda para sa unang sesyon ng Bangsamoro Parliament at mga pulong ng Association of Southeast Asian Nations (ASEAN).
Sa Lapu-Lapu City, lilipat sa asynchronous learning hanggang Oktubre 30 ang mga paaralan sa Barangay Ibo, Buaya, Mactan at P. Engaño, gayundin ang mga sumusunod na piling paaralan at kolehiyo:
–Sto. Niño International School
–EMD Carmelite School Foundation
–Jose Alwins Learning School
–B Cebu Dream Foundation, Inc.
–Cebu International Language TVI Center
–Global Leaders International School
–Newtown School of Excellence
–St. Joseph’s School of Mactan
–Sto. Niño Child Academy
–Lapu-Lapu City College
–Lapu-Lapu Cebu International College
–Sto. Niño Mactan College
Ayon sa pamahalaang lungsod, ipinatupad ang pansamantalang setup mula Oktubre 26 hanggang 30 habang nagho-host ang lungsod ng 20th ASEAN Defense Ministers’ Meeting (ADMM), 13th ADMM-Plus at mga kaugnay na pulong.
Sa Cotabato City, sinuspinde rin ang face-to-face classes sa lahat ng antas, kabilang ang graduate at professional programs, hanggang Oktubre 31. Ipinatupad ang hakbang mula Oktubre 26 bilang bahagi ng paghahanda at seguridad para sa unang inaugural session ng Parlamento ng Bangsamoro Autonomous Region in Muslim Mindanao.
Samantala, lumipat naman sa online learning hanggang Oktubre 29 ang Philippine Science High School Main Campus sa Diliman, Quezon City, dahil sa pagdami ng mga kaso ng sakit na may sintomas na parang trangkaso sa kampus.
Ayon sa paaralan, layunin ng pansamantalang online setup na mabigyan ng panahon ang mga apektadong estudyante at guro na gumaling at mabawasan ang pagkalat ng sakit. RNT/MDS
