MANILA, Philippines – Sinibak sa serbisyo si Mayor Jomapher Uy Alvarez ng Luisiana, Laguna, ayon sa Department of Interior and Local Government (DILG) nitong Martes, Oktubre 27.
Sa memorandum ng DILG na may petsang Oktubre 19 at kinumpirma ni Interior and Local Government Secretary Jonvic Remulla, dinismis ng Office of the Ombudsman si Alvarez matapos mapatunayang sangkot sa grave misconduct.
Kabilang sa utos ang pag-alis ng kanyang retirement benefits at perpetual disqualification sa paghawak ng pampublikong opisina.
Hindi rin papayagan si Alvarez na kumuha ng Civil Service exams.
Noong Agosto ay inisyuhan ng 90-day preventive suspension si Alvarez dahil sa kasong inihain sa kanya.
Si Alvarez ay inakusahan ng paglabag sa Anti-Graft and Corrupt Practices Act matapos ang hindi pagbabayad ng terminal leave benefits ni dating Luisiana Mayor Nestor Rondilla.
Si Rondilla ang naghain ng reklamo laban kay Alvarez.
Wala pang tugon ang sinibak na mayor kaugnay dito. RNT/JGC
