MANILA, Philippines – Nagsampa ng reklamong cyberlibel si dating National Security Adviser Clarita Carlos sa National Bureau of Investigation (NBI) laban kina Philippine Coast Guard spokesperson for the West Philippine Sea (WPS) Rear Adm. Jay Tarriela at Philippine Military Academy Superintendent Lt. Gen. Michael Logico, ayon kay NBI director Melvin Matibag.
“She actually filed a complaint na cyberlibel [against] different personalities,” ani Matibag
“We also entertained her.”
Si Carlos ay dumating sa NBI noong nakaraang linggo para maghain ng reklamo.
Ani Matibag, magpapadala ng sulat ang NBI kina Tarriela, Logico, at iba pang indibidwal na pinangalanan sa reklamo para makuha ang kanilang panig.
“Actually, yun naman yung discussion namin kay Professor Carlos that we will inform them of the complaint so that they can respond properly also,” aniya.
Hindi na idinetalye ni Matibag kung kailan ipadadala ang liham sa mga opisyal.
“Once I receive the formal notice, I will respond through the proper legal process,” tugon naman ni Tarriela kaugnay nito.
“What I can say is that the public has been fully aware of what former Professor Clarita Carlos has said and posted on social media recently. I will leave it to our countrymen to judge for themselves,” dagdag pa niya.
Kamakailan ay nag-isyu si Tarriela ng pahayag na kumikwestyon kung bakit tila mas galit pa si Carlos sa kanya kaysa sa China nang tawagin itong “troublemaker” kasabay ng pagdepensa sa kontrobersyal na pahayag ni Chinese Ambassador Jing Quan kaugnay sa military advantage ng Beijing sa Pilipinas.
“Tinuruan ako ng aking mga magulang na huwag magsalita nang masama laban sa matatanda. Pero since nagmumura na si lola, let me respond… Your statements proved only one thing: kung bakit you were not able to at least be the National Security Adviser kahit one year man lang. Imagine mas galit pa kayo sa akin kaysa sa China,” sinabi ni Tarriela.
“Now I remember why I walked out of her class during MNSA (Master in National Security Administration),” sinabi naman ni Logico. RNT/JGC
