MANILA, Philippines — Maaaring maghulog ng mula P760 hanggang P5,280 kada buwan sa Social Security System (SSS) ang mga virtual assistant at freelancer na magpaparehistro bilang self-employed members.
Ito ay kasunod ng partnership ng SSS at Department of Information and Communications Technology (DICT) para mapalawak ang social security coverage sa tinatayang 1.5 milyong digital freelance workers sa bansa.
Ayon sa SSS, nasa 15% ang kasalukuyang contribution rate, habang ang Monthly Salary Credit (MSC) para sa self-employed members ay mula P5,000 hanggang P35,000.
Sa pinakamababang bracket, P760 kada buwan ang hulog, na binubuo ng P750 regular SSS contribution at P10 Employees’ Compensation contribution.
Samantala, umaabot sa P5,280 kada buwan ang pinakamataas na contribution, na binubuo ng P3,000 regular SSS contribution, P30 Employees’ Compensation at P2,250 Mandatory Provident Fund.
Ang Mandatory Provident Fund ay retirement savings program para sa mga miyembrong may Monthly Salary Credit na lampas P20,000.
Kapag nakapagparehistro bilang self-employed SSS member, maaaring maging kwalipikado ang mga freelancer at virtual assistant sa sickness, maternity, disability, retirement, funeral at death benefits.
Saklaw din sila ng Employees’ Compensation Program para sa work-related sickness, disability o death.
Maaari ring mag-apply ang mga kwalipikadong self-employed members sa ilang SSS loan programs.
Ayon sa SSS, ibinabatay ang MSC at kaukulang hulog ng self-employed member sa kanyang idineklarang aktuwal na buwanang kita.
Sinabi ni SSS President at CEO Victor Alfonso Limlingan na layunin ng partnership sa DICT na mabigyan din ng social protection ang lumalaking bilang ng freelancers at virtual assistants sa bansa. Dave Medina
