MANILA, Philippines – Naglunsad ang Philippine Airlines (PAL) ng Year-End Seat Sale na nag-aalok ng hanggang 60% diskuwento sa base fare ng piling domestic flights at hanggang 40% naman sa international flights.
Magsisimula ang booking period ngayong Lunes, Nobyembre 9, at magtatapos sa Linggo, Nobyembre 15, 2026.
Para sa mga biyaheng mula Disyembre 1, 2026 hanggang Marso 31, 2027, maaaring makakuha ng hanggang 40% diskuwento sa domestic base fares at 30% naman sa international base fares.
Mas malaking diskuwento naman ang alok para sa mga biyaheng magsisimula sa Abril 1, 2027, kung saan aabot sa 60% ang bawas sa domestic base fares at 40% sa international base fares.
Saklaw ng promosyon ang piling destinasyon sa Pilipinas, Asia, North America, Australia at Middle East.
Bukod sa discounted flights, nag-aalok din ang PAL ng 0% installment payment sa pamamagitan ng piling credit card partners upang mas mapagaan ang pagbabayad ng mga pasahero.
Gayunman, nakadepende sa bangko, halaga ng transaksyon at booking channel ang mga kondisyon ng installment.
Pinaalalahanan din ang mga pasahero na ang diskuwento ay para lamang sa base fare at hindi kasama ang mga buwis, surcharge at iba pang bayarin.
Limitado rin ang promotional seats at maaaring may blackout dates depende sa destinasyon at iskedyul ng biyahe.
Maaaring mag-book sa opisyal na website ng PAL, mobile app, ticketing offices at mga accredited travel agent. Dave Medina
