MANILA, Philippines – Hindi pa naipapasa ng defense witness sa impeachment trial ni Vice President Sara Duterte ang mga dokumento na hiniling ng senator-judges, ayon kay Senate Impeachment Court Presiding Officer Francis Escudero ngayong Martes, Nobyembre 10.
Ang witness na si Davao City Assessor Engr. Jaime Adalin, ay hiningian ng listahan ng mga ari-arian na pagmamay-ari ni Duterte at asawa nitong si Atty. Manases Carpio, sa Barangay Matina Crossing, Talomo.
Hiniling din kay Adalin na ibigay ang pangalan ng travel agency na tumulong sa kanya para makalipad sa China matapos niyang kumpirmahin na bumiyahe patungo sa nasabing bansa kasama ang iba pang opisyal ng Davao City.
“Yesterday, a request was made by Senator-judge [Bam] Aquino as well as Senator-judge [Risa] Hontiveros for the list of properties owned and/or in the name of singularly or jointly of Atty. Carpio and the vice president… We have not received such a report from Engr. Adalin, neither have we received a copy or name of the travel agency requested by Senator-judge Raffy Tulfo,” sinabi ni Escudero sa korte.
Dahil dito ay inatasan niya ang clerk of court na mag-follow up kay Adalin.
“If by tomorrow the same is not yet complied with, unless sufficient cause or reason is given, the court will be forced to issue compulsory process on the same,” sinabi ni Escudero.
Nagpaalala rin si Hontiveros sa korte na nag-commit si Adalin na ipasa ang mga dokumento. RNT/JGC
