Duterte walang hawak na shares sa GenCorp industries – defense witness

MANILA, Philippines – Inihayag ni Defense Witness Atty. Suzette Balucanag-Punay, corporate counsel ng GenCorp Industries, Inc. at Metro City Chow Foods Corporation na walang hawak na shares si Vice President Sara Duterte sa GenCorp Industries Inc.

Ito ay kasabay ng pagdinig ng impeachment court sa impeachment case laban kay Duterte na tumatalakay sa Articles of Impeachment kaugnay sa unexplained wealth ng Bise Presidente.

Sa direct examination ni defense counsel Justin Gular, sinabi ni Punay na wala ang pangalan ni Duterte sa General Information Sheets (GIS) ng Gencorp Industries, Inc. mula 2022 hanggang 2025 o mga taon na siya ay Bise Presidente na.

“Magkano ang shares na hawak ng Bise Presidente, kung mayroon man, sa GenCorp Industries, Inc.?” tanong ng abogado ng depensa na si Justin Nicol Gular kay Punay.

“She has no stockholdings with GenCorp.,” sagot ni Punay.

Ani Punay, wala ring shareholdings o posisyon ang Bise Presidente sa Gencorp Industries, Inc. mula 2022 hanggang 2025.

Dagdag pa, hindi rin aniya nakatanggap si Duterte ng dibidendo sa mga nabanggit na taon dahil walang idineklarang dividend ang Gencorp Industries, Inc.

Kamakailan ay ipinresenta ng prosekusyon ang 2024 at 2025 Statement of Assets, Liabilities and Net Worth (SALN) ni Duterte na inihain kasama ang asawang si Manases Carpio bilang ebidensya na nagpapakitang ang Gencorp Industries Inc., dating Timesquare Bee Foods Corp. at Great Jolly Times Food, ay isa sa kanyang business interests.

Nakalista rin umano ang dating pangalan ng Gencorp Industries Inc. na Timesquare Bee Foods Corp., bilang isa sa kanyang business interests sa kanyang 2022 at 2023 SALNs na ipinresenta ng prosekusyon bilang ebidensya. RNT/JGC