MANILA, Philippines – Nagpahayag ng pangamba ang prosekusyon sa umano’y dollar accounts ni Vice President Sara Duterte matapos alisin ng kaniyang defense team ang isang opisyal ng Bank of the Philippine Islands (BPI) sa listahan ng mga testigo sa impeachment trial sa Senado.
Ayon kay defense team spokesperson Michael Poa, hindi na kailangan ang testimonya ni BPI senior vice president at abogado Paul Roderick Ysmael dahil ang tungkulin sana nito ay patotohanan ang isang liham na inamin na ni Poa na siya ang sumulat.
“I believe the record should bear that during interpellation I was already asked about the letter and I have admitted in open court that I wrote that letter, so I think it would be in the interest of time that we just dispense with this witness since it is only for the purpose of authentication,” pahayag ni Poa.
Sinabi rin niyang naitala na bilang ebidensiya ng depensa ang liham na naglalaman ng kahilingan.
Gayunman, sinabi ni private prosecutor James Bryan Ibrahim Alih na nais nilang tanungin ang BPI official tungkol sa mga bank record na may kaugnayan sa umano’y dollar accounts ng bise presidente.
“This becomes an issue for us now, Your Honor, because there would be some questions that we want to ask on the basis of those records,” ani Alih.
Ipinaliwanag niya kay Senate impeachment court presiding officer Francis Escudero na nais nilang bigyang-pansin ang ilang bahagi ng mga dokumento, kabilang ang liham umano ng BPI na nagpapatunay na may dollar accounts ang bise presidente.
“We just wanted to highlight certain portions, Your Honor, particularly, say for example, one letter coming from the BPI where it confirmed that the vice president had dollar accounts,” aniya.
Ayon kay Alih, hindi nila nasuri ang naturang mga rekord dahil hindi kasama sa naunang subpoena ang dollar accounts.
“This was not within our visibility because the subpoena issued previously did not include dollar accounts, and that was precisely one of the points [that], if allowed, would have been part of our cross-examination,” dagdag niya.
Hindi pinayagan ni Escudero na talakayin pa ng prosekusyon ang usapin sa ngayon. Sinabi niyang maaari itong maghain ng argumento matapos maipresenta ng depensa ang mga ebidensiya nito, sa pamamagitan ng rebuttal evidence o memorandum.
“I’m afraid I cannot allow that at this point because you will be substituting your interpretation of documents that have not yet been presented before this Court,” paliwanag ni Escudero.
Dagdag niya, hindi makikialam ang korte sa desisyon ng depensa kung sinu-sinong testigo ang ihaharap nito.
“Finally, the Court would not want to interfere nor dictate on the Respondent’s decision with respect to which witnesses to present, and that will be made part of their evidence-in-chief,” aniya.
Noong Miyerkules, sinabi ni Poa na hindi na rin ihaharap ng depensa ang testimonya ng 15 iba pang opisyal ng bangko.
Matatandaang ang Article II, na tumatalakay sa alegasyon ng unexplained wealth, na lamang ang natitirang aktibong impeachment charge matapos bawiin ng prosekusyon ang tatlo pang artikulo noong Oktubre 13. RNT/MDS
