MANILA, Philippines – Kasabay ng pangunguna ng Pilipinas sa 47th General Assembly ng Association of Southeast Asian Nations (Asean) Inter-Parliamentary Assembly (AIPA), nanawagan si House Speaker Faustino “Bojie” G. Dy III sa mga mambabatas sa Southeast Asia na tumulong sa pagpapalakas ng regional cooperation sa pagtugon sa mga alalahanin.
Ang panawagan ni AIPA President Dy ay kasabay ng pagtitipon ng parliamentary delegation para sa preparatory meeting sa Makati City bago pormal na pagsisimula ng 49th Asean Summit ngayong Linggo, Nobyembre 15.
Tinukoy niya ang kahalagahan ng institutional partnership para marinig ng foreign leaders ang mga isyu sa Southeast Asia.
“As we gather here, our primary task is to bridge the voices of our people with the aspirational goals of ASEAN,” sinabi ni Dy sa kanyang opening remarks.
“Our aim is to enhance the institutional partnership between the executive and legislative branches to ensure a resilient and inclusive community,” dagdag pa niya.
Bilang bahagi ng event sa 49th Asean Summit, magsisimula rin ngayong araw ang 15th Asean-AIPA Leaders’ Interface sa Philippine International Convention Center main venue sa Pasay City.
Lalahok ang mga foreign leader at delegasyon mula sa 11 member states at dialogue partners na China, South Korea, Japan, United States, Australia, New Zealand, India at Canada para pag-usapan ang shared regional concerns mula ngayong araw hanggang sa Nobyembre 17.
Nakatakdang buksan ni Pangulong Ferdinand Marcos Jr. ang dialogue at pangungunahan naman ni Dy ang AIPA presentation. RNT/JGC
