MANILA, Philippines – Nakapagtala ang Armed Forces of the Philippines (AFP) ng 18 Chinese vessels sa ilang bahagi ng West Philippine Sea (WPS) mula Agosto 4 hanggang 10.
Ayon kay AFP spokesperson for the WPS Rear Admiral Roy Vincent Trinidad, ito ang mga namataang barko ng People’s Liberation Army Navy (PLAN) at China Coast Guard (CCG):
–Ayungin Shoal – 8 CCG vessels
–Bajo de Masinloc – 1 PLAN vessel at 7 CCG vessels
–Escoda Shoal – 1 CCG vessel
–Pag-asa Islands – 1 CCG vessel
Noong Hulyo, umabot sa 48 Chinese vessels ang naitala sa WPS.
Patuloy ang tensyon sa South China Sea dahil inaangkin ng China ang halos buong karagatan, kabilang ang mga bahaging inaangkin din ng Pilipinas, Vietnam, Indonesia, Malaysia, at Brunei.
Ang West Philippine Sea ay tumutukoy sa mga karagatang nasa kanlurang bahagi ng Pilipinas, kabilang ang Luzon Sea, Kalayaan Island Group, at Bajo de Masinloc.
Noong 2016, nagpasya ang Permanent Court of Arbitration sa The Hague pabor sa Pilipinas at nagsabing “no legal basis” ang pag-angkin ng China sa South China Sea. Hindi kinikilala ng China ang nasabing desisyon. RNT/MDS
